ព្រះសីហនុ៖ មន្ទីរសាធារណការ និងដឹកជញ្ជូនខេត្តព្រះសីហនុ ជូនដំណឹងដល់សាធារណជន និងប្រជាពលរដ្ឋ ដោយផ្លូវជាតិលេខ៤ ត្រូវបានផ្អាកចរាចរណ៍ជាបណ្តោះអាសន្ន។

សេចក្តីជូនដំណឹងឱ្យដឹងថា ស្ថានភាពផ្លូវជាតិលេខ៤ ដោយរយៈពេល២-៣ថ្ងៃកន្លងមក មានភ្លៀងធ្លាក់ច្រើនជាបន្តបន្ទាប់ បានធ្វើឱ្យមានការជន់លិចផ្លូវជាតិលេខ៤ ត្រង់ស្ពានស្ទឹងសំរោង ចន្លោះគីឡូម៉ែត្រលេខ១១៥ ដល់គីឡូម៉ែត្រលេខ១១៦ និងត្រង់ស្ពានអូរគគីរ ចន្លោះគីឡូម៉ែត្រលេខ១០៦ ដល់គីឡូម៉ែត្រលេខ១០៨ ដូចនេះមន្ទីរសាធារណការ និងដឹកជញ្ជូនខេត្តព្រះសីហនុ សូមធ្វើការផ្អាកជាបណ្តោះអាសន្ន ចាប់ពីថ្ងៃជូនដំណឹងនេះទៅ រហូតមានការជូនដំណឹងសារជាថ្មី។

ដើម្បីធានាដល់សុវត្ថិភាពក្នុងការធ្វើដំណើរ ក្រសួងស្នើសាធារណជន និងបងប្អូនប្រជាពលរដ្ឋ សូមរកផ្លូវវៀងជាបណ្តោះអាសន្នសិន ឬអាចប្រើប្រាស់ផ្លូវល្បឿនលឿន។

សូមបញ្ជាក់ផងដែរថា មកទល់និងម៉ោង១រសៀលថ្ងៃដដែលនេះភ្លៀងនូវតែបន្តធ្លាក់គ្រុបក្រុងស្រុកក្នុងខេត្តព្រះសីហនុផងដែរ គិតត្រឹមរសៀលថ្ងៃដដែលនេះទាន់មានរបាយការណ៍ពីអាជ្ញាធរថា មានផលប៉ះដោយគ្រោះទឹកជំនន់នេះទៅលើផ្ទះពលរដ្ឋឬមានមនុស្សរងគ្រោះថ្នាក់នៅឡើយទេ៕